الغربه .هدية الى كل عراقي متغرب عن الوطن

ناديت من الغرب محد سمع صوتي

لابوي لا صحبتي لاأمي لاخوتي

بالغربة احس مختنك وارد ابجي واصرخ حيل

ومرات احس انتهت روحي وقرب موتي

آني وجنطتي أرحلت والدمعه بعيوني

لاأخو مني جزع لاأهلي ملوني

عفت الدال ورحت للغربة نص الليل

ودكيت باب الغرب المايعرفوني

الما يعرفك ما يثمك

والما مجربك ما يأمنك

درت الشوارع مشي والحيرة بقدامي

وظني بهذا المشي تتحقق أحلامي

ثاري الشوارع ماهي ألنه

ووجوه ما هي وجوه أهلنه

أشجابني للغرب ليش أتركت بيتي

يا قيمتي عد هلي يا سمعتي وصيتي

آني الجنت للظهر متهني أبنومي

واحتار وكت العصر شلبس أمن اهدومي

راسلت مرة هلي وردت انطي عنواني

وبالغربة أبن من أنا ويابيت يرضاني

ومن أجي تعبان أنا ياهو أيتلكاني

صح البشر بالغرب تحجي ويفهمونك

تكعد تروح وتجي بس ما يقيمونك

انت مجرد شخص متغرب ورحال

عفت اهلك وديرتك وتخضعت للمال

لحظة بعدما أظل بين الغرب شلي

واسلم على ما بقى من قيمتي أحسلي

خزن بعيني الدمع يم الغرب مبجيت

وارد أبجي مثل الطفل يم باب بيت اهلي